པདྨ་གླིང་པའི་བཀའ་ཐང་ལྟར་ན་སངས་རྒྱས་སྟོང་རྩ་གཉིས་ཀྱི་ཐོག་མ་སངས་རྒྱས་གསེར་ཐུབ་དང་དེའི་འོག་ཏུ་སངས་རྒྱས་འོད་སྲུངས། དེའི་འོག་ཏུ་སངས་རྒྱས་ཤཱཀྱ་ཐུབ་པ། དེའི་རྗེས་སུ་བྱམས་པ་མགོན་པོ་ཡིན་པར་སྣང་།
སངས་རྒྱས་སྟོང་གི་གླེང་གཞི་ནི་འཇིག་རྟེན་ཁམས་རྣམ་པར་བརྒྱན་པ་ཞེས་བྱ་བར་རྒྱལ་པོ་ཡུལ་འཁོར་སྲུང་གི་སྐབས་སུ་ཡིན་པར་འདུག།
གོའུ་ཏ་མ་ཞེས་པ་ཉི་འོག་གི་རྒྱལ་པོ་རྣ་བ་ཅན་གྱི་སྲས་སུ་སྐྱེས་པར་གསུངས། དེ་ནས་མ་ཉེས་ཁ་གཡོག་གིས་རྐྱེན་བྱས་ཏེ་ཚེ་འཕོས་ནས་དམ་པ་ཏོག་དཀར་དུ་སྐྱེ་བ་བཞེས། དེ་ནས་རྒྱལ་བ་བྱམས་པ་མགོན་པོ་རྒྱལ་ཚབ་ཏུ་མངའ་གསོལ་ནས་རྒྱལ་པོ་ཟས་གཙང་གི་སྲས་སུ་འཁྲུངས།
བླ་མེད་དོན་རྫོགས་རྒྱུད་ལས། ང་ནི་འདི་ལས་མྱ་ངན་འདས་འོག་ཏུ༔ ལོ་ནི་བཅུ་རུ་གཉིས་ཀྱི་ཆད་པ་ན༔ འཇིག་རྟེན་ཀུན་ལས་རྒྱལ་བའི་མཆོག་གྱུར་པ༔ ཨུ་རྒྱན་ཡུལ་དུ་ཤཱཀ་ཐུབ་ང་ཉིད་འབྱུང་༔ ཨུ་རྒྱན་པདྨ་འབྱུང་གནས་ཞེས་བྱ་བ༔ གསང་སྔགས་བདག་པོར་སྟོན་པས་ལུང་དུ་བསྟན༔
གསེར་འོད་དམ་པའི་མདོ་ལས། པདྨ་འབྱུང་གནས་འདི༔ འདས་པ་དང་༔ མ་འོངས་པ་དང་༔ ད་ལྟར་བྱུང་པའི་སངས་རྒྱས་བཅོམ་ལྡན་འདས་རྣམས་ལ་མངོན་པར་བསྟོད་དོ༔
བཀའ་འདུས་རྩ་བའི་རྒྱུད་ལས། སྤྱི་དཔལ་ཆེནཔོ་ང་དང་གཉིས་སུ་མེད༔ སྤྲུལ་སྐུ་མཚོ་སྐྱེས་རྡོ་རྗེ་ཞེས་བྱ་བ༔ ད་ལྟ་ང་དང་ཚུལ་མཐུན་པ་ཅིག་འབྱུང་༔ དེའི་བཀའ་འདུས་སྤྱི་ཏིའི་ཐེག་པ་དང་༔ ཟ་ཧོར་ཡུལ་དུ་རྒྱལ་པོ་གཙུག་ལག་འཛིན༔ ལ་སོགས་པ་ལ་རྒྱས་པར་སྟོན་པར་འགྱུར༔ ཅེས་གསུངས་སོ༔
མྱ་ངན་ལས་འདས་པའི་མདོ་ལས༔ ཤིང་སཱ་ལའི་དྲུང་༔ རྩ་མཆོག་གཉིས་ཀྱི་བར་ན༔ བཅོམ་ལྡན་འདས་འོད་སྲུངས༔ གཅུང་དགའ་བོ་མ་གཏོགས་པ༔ དགེ་སློང་གི་དགེ་འདུན་བརྒྱ་ཕྲག་བཅུས་བསྐོར་ནས་བཞུགས་པ་ལ༔ ཉེ་གནས་ཆེན་པོ་ཀ་ཏྱ་ཡ་ན་དང་༔ ཙུན་དྷ་དང་༔ མ་འགགས་པ་དང་༔ ཀུན་དགའ་བོ་རྣམས་ལ༔ ང་ནི་ཡོངས་སུ་མྱ་ངན་ལས་འདའ༔ ཁྱེད་རྣམས་མྱ་ངན་མ་བྱེད་ཅིག༔ འདི་ནས་བཞི་གཉིས་ལོན་པ་ན༔ མདངས་ལྡན་དྲི་མེད་མཚོ་དཀྱིལ་དུ༔ ང་ལས་ལྷག་པའི་སྐྱེས་བུ་འབྱུང་༔ ཁྱེད་རྣམས་ངུ་བར་མ་བྱེད་ཅིག༔ཚེ་ལོ་གྲངས་མེད་ཐུབ་པ་ཡང་༔ མཐའ་མ་འཆི་བར་ཤེས་པར་བྱའོ༔ ཞེས་གསུངས་སོ༔
སྒྲ་བསྒྱུར་ཚུལ་ལ་༡༽སྒྲ་ཐོག་ཏུ་བསྒྱུར་བ། ༢༽སྒྲ་ཐད་སོར་བསྒྱུར་བ། ༣༽སྒྲ་རྒྱུད་དེ་བསྒྱུར་བ། ༤༽སྒྲ་གཅིག་བསྒྱུར་བ།
སློབ་དཔོན་ཆེན་པོ་པདྨ་འབྱུང་གནས་ཀྱིས་སློབ་དཔོན་པྲ་བྷ་ཧསྟི་ལ་རབ་ཏུ་བྱུང་བར་ཞུས་པས་སློབ་དཔོན་གྱི་ཞལ་ནས་ཁོང་གིས་རྣལ་འབྱོར་ཡོ་གའི་རྒྱུད་རྣམས་བསླབས་ཀྱི། རབ་ཏུ་འབྱུང་བར་འདོད་ན་ཟ་ཧོར་རྒྱལ་པོའི་ཡུལ་དབུས་ཨ་སུ་ར་ཤེལ་གྱི་ཕུག་པར་ཀུན་དགའ་བོ་དང་འོད་སྲུངས་བཞུགས་ཡོད་པས་དེར་སོང་ཞིག་ཅེས་ལུང་བསྟན་པར་མཛད་པ་ལྟར། སློབ་དཔོན་ཆེན་པོས་དེར་ཕེབས་ཏེ་ཉི་མ་གུང་པ་དང་ལྷན་དུ་ཀུན་དགའ་བོ་ལས་རབ་ཏུ་བྱུང་། མཚན་ཡང་ཤཱཀྱ་སེངྒེར་བཏགས། བུ་སྟོན་ཆོས་བྱུང་ལྟར་ན་ཀུན་དགའ་བོས་རྒྱ་མཚོའི་དཀྱིལ་དུ་གླིང་ཞིག་སྤྲུལ་ནས་ཉི་མ་གུང་པ་དང་ལྷན་དུ་འཁོར་ལྔ་བརྒྱ་ཙམ་རབ་ཏུ་བྱུང་བར་གསུངས།
ཐུབ་པའི་དབང་པོས་ལོ་༢༩ ཁབ་ཏུ་གནས། ལོ་དྲུག་དཀའ་བ་སྤྱད། ལེགས་པའི་ཀརྨས་ལོ་གྲངས་༢༤ ཞབས་འབྲིང་བྱས། ཀུན་དགའ་བོས་༢༡ ཞབས་འབྲིང་བྱས། ཐུབ་དབང་གིས་དགུང་ལོ་༣༥ ལོན་ནས་ལྕགས་ཕོ་ཁྱིའི་ལོ་ནས་ལོ་བདུན་ཟླ་བ་གཉིས་ཀྱིས་མ་ཚང་བར་བཀའ་ཐོག་མ་བདེན་པ་བཞིའི་ཆོས་འཁོར་བསྐོར། མེ་ཕོ་འབྲུག་ལོ་ནས་ཤིང་མོ་གླང་བར་ལོ་བཅུའི་རིང་མ་ག་ཏའི་ཡུལ་སོགས་སུ་བཀའ་བར་པ་མཚན་ཉིད་མེད་པའི་ཆོས་འཁོར་བསྐོར། མེ་ཕོ་སྟག་ནས་ས་ཕོ་སྟག་གི་བར་ལོ་བཅུ་གགསུམ་བར་ཡངས་པ་ཅན་སོགས་སུ་བཀའ་ཐ་མ་ངེས་དོན་གྱི་ཆོས་འཁོར་བསྐོར། ས་མོ་ཡོས་ནས་ཤིང་མོ་བྱའི་བར་ལོ་བདུན་བར་དུ་གསང་སྔགས་ཕྱི་པ་གསུངས། སྔགས་ནང་པ་ནི་མ་གསུངས།
སྟོན་པ་འདས་རྗེས་ཀྱི་འབྱུང་བའི་ལུང་བསྟན།
སྟོན་པ་འདས་ནས་ལོ་༡༡༢ ན་རྒྱལ་པོ་ཛ་འབྱུང་། ལོ་༨༠ ན་དེ་བ་བཟང་སྐྱོང་འབྱུང་། ལོ་༤༠༠ ན་སློབ་དཔོན་ཀླུ་སྒྲུབ་འབྱུང་། ལོ་༣༣༠ ན་སངས་རྒྱས་གསང་བ་འབྱུང་། ལོ་༥༧༠ ན་བལ་པོའི་ཡུལ་དུ་ཧཱུཾ་ཆེན་ཀ་ར་འབྱུང་། ལོ་༨༨༩ ན་ཟི་ཡན་ཏའི་ཡུལ་དུ་ཐོགས་མེད་དབྱིག་གཉེན་མཆེད་གཉིས་འབྱུང་།
ལོ་༤༢ ན་སིངྒ་ལའི་ཡུལ་དུ་ཨཱརྱ་དེ་ཝ་འབྱུང་། ལོ་༣༦༠༠ ལ་བོད་དུ་དམ་ཆོས་འབྱུང་བར་གྱུར་ནས་ལོ་༢༥༠༠ འི་བར་དུ་དར་ཞིང་རྒྱས་པར་འགྱུར།
རྒྱལ་པོ་ཨ་ཤོ་ཀས་བསྟན་པའི་དབྱེན་བྱས་དགེ་འདུན་སྡེ་གཉིས་སུ་གྱེས་པར་གྱུར་ཅིང་དགེ་འདུན་གཞོན་པ་མང་པོ་དང་རྒན་པ་ཉུང་ཞིག་བསད་དེ། མི་ལོ་ཉིས་བརྒྱ་ལྷག་ཙམ་སོང་། རྒྱལ་པོ་དེ་ཡིས་རྔ་སྒྲ་ཅན་རྣམས་བཅོམ། གྲོང་ཁྱེར་ཤིང་ཐག་ཅན་རྣམས་འཇོམས་པའི་སྐབས་པད་འབྱུང་གིས་དགེ་སློང་གཅིག་ཏུ་སྤྲུལ་ནས་བཏུལ་བར་གསུངས།
མགོན་པོ་ཀླུ་སྒྲུབ་ནི་ལྷོ་ཕྱོགས་བེ་ཏའི་ཡུལ་དུ་རྒྱལ་པོ་འཚོ་བྱེད་སྟོབས་བཟང་བྱ་བར་བཙུན་མོ་ཆེ་ཆུང་གཉིས་ཡོད་པའི་ཆུང་ངུའི་སྲས་སུ་འཁྲུངས། ཡབ་ཀྱིས་བཙུན་མོ་ཆེན་མའི་སྲས་ལ་གསོ་བ་རིག་པ་ཐམས་ཅད་རྫོགས་པར་བསླབས། ཆུང་མའི་སྲས་ལ་དུས་ལན་གཅིག་གནང་ནས་ནམ་ཞིག་གི་ཚེ་སྲས་གཉིས་ཡོན་ཏན་བསྡུར་དགོས་གསུངས། བཙུན་མོ་ཆུང་བའི་བསམ་པར་ངའི་བུ་ལ་རྒྱལ་ས་མི་ཡོང་བའི་བཀའ་ལུང་ཡིན་སྙམ་སྟེ་སྡུག་བསྔལ་བར་གྱུར། ནུབ་གཅིག་ཡུམ་སྲས་གཉིས་བློ་མཐུན་པར་ཡབ་ཀྱི་མཆོད་གནས་དགེ་སློང་དབང་པོའི་སྡེའི་དྲུང་དུ་སོང་ནས་རིག་པའི་གནས་ལ་བསླབས་པས་རྒྱུ་མཚན་གོ་བ་ཙམ་གྱིས་དབུ་ཞབས་དོན་ཁོང་དུ་ཆུད། དེ་ནས་ཡོན་ཏན་བསྡུར་བའི་དུས་ལ་བབས་ཏེ་ཁྲི་གཉིས་བརྩིགས་ཏེ་སྲས་གཉིས་བཞུགས་སུ་བཅུག ཆེན་མའི་སྲས་ཀྱིས་སྔོན་དུ་གསུངས། བམ་པོ་སུམ་རྒྱ་མཁྱེན་པས་ཡ་མཚན་སྐྱེས། དེ་ནས་ཆུང་མའི་བུས་གསུངས་པར་ཡབ་ཀྱིས་མཁྱེན་པའི་བམ་པོ་སུམ་བརྒྱའི་སྟེངས། གསོ་རིག་བསྟན་བཅོས་སྔར་མ་གྲགས་པ་གསུངས་པས་དམངས་རྣམས་མ་བསླབས་པར་ཤེས་པ་ངོ་ཏམཚར་ཆེ་ཟེར། ཡབ་ཀྱིས་ཕྱག་བཙལ་ནས་ཞབས་སྤྱི་བོར་བླངས། མངའ་ཐང་སྲས་གཉིས་ལ་བགོས་ནས་བཏད་པར། རྒྱལ་བུ་ཆུང་བས་མངའ་ཐང་མི་འདོད་རབ་ཏུ་འབྱུང་བར་གསོལ་ཏེ་དགེ་སློང་དབང་པོའི་སྡེ་ལས་རབ་ཏུ་བྱུང། བསྙེན་པར་རྫོགས་ཏེ་ཆོས་ལ་སྦྱངས་པས་ཆོས་མིང་སི་དྷི་ཕ་ལ་ཞེས་གྲགས། འགྲོ་བའི་དོན་དུ་སྒྲ་ཚད་སོགས་ཀྱི་བསྟན་བཅོས་མང་དུ་མཛད། དེ་དུས་མུ་སྟེགས་ཉི་མའི་སི་དྷིས་ཀ་མ་ཤཱི་ལའི་གཙུག་ལག་ཁང་མེར་བསྲེགས་ཏེ་མངོན་པའི་བཀའ་རྣམས་ཤས་ཆེར་ཙིག དེའི་མི་གྲིབ་ཀླུ་རྒྱལ་ལ་ཕོག ཀླུ་རྒྱལ་ཏང་བཟུང་ནད་ཀྱིས་བཏབ། ཤིན་ཏུ་ཉམས་ཐག་ཅི་བྱས་ཕན་མེད་ནས་ཀླུའི་འཁོར་ཚོགས་གདུང་བའི་སྨྲེ་ངག་བཏོན་པས་ཀླུ་རྒྱལ་དགའ་བོས་འཛམ་བུའི་གླིང་གི་འཙོ་བྱེད་སྤྱན་དྲང་ན་ན་ཚ་འདི་ལས་ཕན་སྲིད་ཟེར། དེ་ནས་ཀླུ་རྣམས་ཀྱི་ནང་ནས་ཆོས་ལ་དད་པ་ཡོད་པ་ནོར་རྒྱས་དང་དུང་སྐྱོང་གཉིས་ཀྱིས་རྫུ་འཕྲུལ་གྱིས་འཛམ་བུའི་གླིང་དུ་དགེ་སློང་ཆེན་པོ་སི་དྷི་ཕ་ལའི་དྲུང་དུ་བཅར། ལོ་རྒྱུས་ཞུས་པས་དགེ་སློང་ཆེན་པོས་གཟིགས་པ་རྣམ་གསུམ་ལ་གཟིགས་ཏེ་ཀླུ་ཡུལ་དུ་ཕེབས། ཀླུ་རྒྱལ་ཏང་བཟུང་ནད་ལས་གྲོལ། ཀླུ་རྒྱལ་གྱིས་དེའི་དྲིན་ལོན་པའི་ཕྱིར་དུ་ཤེར་ཕྱིན་བུམ་པ་དུམ་བུ་བཅུ་དྲུག་ཕུལ། དེ་དུས་སློབ་དཔོན་གྱི་མཙན་དུ་ན་ག་ཛུ་ན་ཞེས་གྲགས་སོ༎
ཨརྱ་དེ་ཝ་ནི་ཨོ་རྒྱན་གྱི་མཁན་པོ་པདྨ་འབྱུང་གནས་སིངྒ་ལ་ཡི་ཡུལ་དུམཁན་པོ་སུ་ནེ་ཊ་ཞེས་གྲགས་པར་སྤྲུལ་ཏེ་ཡུལ་དེའི་རྒྱལ་པོ་ཙནྟྲ་ཤྲཱི་ཀུ་མ་རའི་མཆོད་གནས་སུ་བཞུགས་པའི་དུས་རྒྱལ་པོའི་ལྡུམ་རའི་ནང་མཙོ་དཀྱིལ་གྱི་པདྨའི་སྡོང་པོ་ལས་སྐུ་འཁྲུངས། རྒྱལ་པོས་མཁན་པོ་སུ་ཏི་ཏྲ་ལ་དྲིས་པས་མཁན་པོའི་ཞལ་ནས་དེ་ནི་ཤཱཀྱ་མི་ཏྲའི་སྐྱེ་བ་སྟེ། རྒྱ་གར་ལྷོ་ཕྱོགས་བྲམ་ཟེ་ས་ཏའི་བུ་ཤཱཀྱ་བཤེས་གཉེན་དེ་ཉིད་ཚེ་འཕོས་པ། དབང་ཕྱུག་ཆེན་པོའི་གྲུབ་ཐོབ་ནང་པའི་དགྲ་མ་ཏི་ཙི་ཏྲ་འདུལ་བའི་གཉེན་པོ་ཡིན། ཕོ་བྲང་དུ་སྤྱན་དྲོངས་ལ་བཀུར་སྟི་གྱིས་ཤིག་གསུནས། མདོ་ཕྱོགས་ཀྱི་ལུང་མང་པོ་བཤད་ཅིང་། གསང་སྔགས་རྡོ་རྗེ་ཐེག་པའི་དབང་བསྐུར་ནས་རྒྱུད་ལུང་མན་ངག་ཐམས་ཅད་རྫོགས་པར་བཤད། ཨརྱ་དེ་ཝ་ཞེས་པའི་མཚན་གསོལ། རབ་ཏུ་བྱུང་བར་ཞུས་པས་སྔོན་གྱི་འབྲེལ་བ་ཡོད་པས་ཀླུ་སྒྲུབ་ནས་རབ་ཏུ་བྱུང་བར་གྱིས་ཤིག་ཅེས་ལུང་བསྟན་པ་ལྟར་ལྷོ་ཕྱོགས་དཔལ་གྱི་རི་ལ་བཞུགས་པའི་ཀླུ་སྒྲུབ་ཀྱི་དྲུང་ནས་རབ་ཏུ་བྱུང་སྟེ་མཁས་པའི་མཆོག་ཏུ་གྱུར་ཏོ༎
