ཉིན་པར་བཀྲ་ཤིས་བགེགས་ཞི་བསམ་དོན་འགྲུབ། །མཚན་མོར་བཀྲ་ཤིས་རྨི་ལམ་བཟང་དགུ་མཐོང་། །དུས་ཀུན་བཀྲ་ཤིས་སྙན་གྲགས་རླུང་རྟ་སྤེལ། །རྣམ་ཀུན་བཀྲ་ཤིས་བདེ་ལེགས་འཕེལ་བར་ཤོག། །ལྷ་ཡི་བཀྲ་ཤིས་ངོ་མཚར་འབྲུག་ལྟར་སྒྲོགས། །ཀླུ་ཡི་བཀྲ་ཤིས་དཔལ་འབྱོར་མཚོ་ལྟར་བསྐྱིལ། །མི་ཡི་བཀྲ་ཤིས་དཀར་ཆོས་རྣམ་པར་འཕེལ། །ཀུན་ཀྱང་བཀྲ་ཤིས་ཆོས་སྲིད་བརྟན་པར་ཤོག། །བླ་མའི་བཀྲ་ཤིས་བྱིན་རླབས་སྤྲིན་ཕུང་འཁྲིགས། །ཡི་དམ་བཀྲ་ཤིས་གྲུབ་གཉིས་ཆར་དུ་བསྙིལ། །མཁའ་འགྲོའི་བཀྲ་ཤིས་འཕྲིན་ལས་རྩི་སྨན་རྒྱས། །རྩ་གསུམ་བཀྲ་ཤིས་དོན་གཉིས་ལྷུན་གྲུབ་ཤོག། །སངས་རྒྱས་བཀྲ་ཤིས་སྤངས་རྟོགས་བཅུད་ཀྱིས་གཏམ། །དམ་ཆོས་བཀྲ་ཤིས་བདེན་གཉིས་འདོད་པ་འཇོ། །དགེ་འདུན་བཀྲ་ཤིས་ཉེས་པའི་གདུང་ཀུན་སེལ། །མཆོག་གསུམ་བཀྲ་ཤིས་སྲིད་ན་བརྟན་པར་ཤོག། །ཆོས་སྐུའི་བཀྲ་ཤིས་ཟག་མེད་གཏེར་གྱི་འབྱོར། །ལོངས་སྐུའི་བཀྲ་ཤིས་རྟག་བརྟན་ལྷུན་གྱིས་གྲུབ། །སྤྲུལ་སྐུའི་བཀྲ་ཤིས་འདུལ་བཞིའི་ཕྲིན་ལས་རྒྱས། །སྐུ་གསུམ་བཀྲ་ཤིས་འབད་མེད་ལྷུན་གྲུབ་ཤོག། །སོ་ཐར་བཀྲ་ཤིས་ངེས་འབྱུང་ཞིང་ས་གཤིན། །བྱང་སེམས་བཀྲ་ཤིས་གཞན་ཕན་མྱུ་གུ་རྒྱས། །གསང་སྔགས་བཀྲ་ཤིས་རིམ་གཉིས་འབྲས་བུས་ཕྱུག། །སྡོམ་གསུམ་བཀྲ་ཤིས་བསླབ་གསོ་གོང་འཕེལ་ཤོག། །ཐོག་མར་བཀྲ་ཤིས་གཞི་རྒྱུད་བཻ་ཌུརྻ། །བར་དུ་བཀྲ་ཤིས་ལམ་རྒྱུད་བྱི་དོར་མཁས། །ཐ་མར་བཀྲ་ཤིས་འབྲས་རྒྱུད་འདོད་པ་འཇོ། །དུས་གསུམ་བཀྲ་ཤིས་རྟག་བརྟན་ལྷུན་གྲུབ་ཤོག། །བླ་མའི་བཀྲ་ཤིས་སྨིན་གྲོལ་གདམས་ཟབ་འཇོ། །སློབ་མའི་བཀྲ་ཤིས་དད་དམ་རྣམ་པར་དག། །བླ་སློབ་བཀྲ་ཤིས་བཤད་སྒྲུབ་ཕྱོགས་སུ་འགྲིགས། །རྒྱལ་བསྟན་བཀྲ་ཤིས་སྲིད་མཐར་འཕེལ་རྒྱས་ཤོག། །སྣོད་ཀྱི་བཀྲ་ཤིས་དགེ་བཅུ་གཡང་དུ་འཁྱིལ། །བཅུད་ཀྱི་བཀྲ་ཤིས་ཚེ་དཔལ་འབྱོར་ཚོགས་རྒྱས། །སྣོད་བཅུད་བཀྲ་ཤིས་རྟེན་འབྱུང་གཅིག་ཏུ་ཚོགས། །ཐར་གྲོལ་བཀྲ་ཤིས་འབྲས་བུས་འབྱོར་པར་ཤོག། །མཆོད་གནས་བཀྲ་ཤིས་བསྡུ་བཞིའི་ཕྲིན་ལས་རྒྱས། །ཡོན་བདག་བཀྲ་ཤིས་སྡེ་བཞིའི་མངའ་ཐང་དར། །མཆོད་ཡོན་བཀྲ་ཤིས་རྣམ་དཀར་འབྲས་བུས་ཕྱུག། །ཀུན་ཀྱང་བཀྲ་ཤིས་བདེ་ལེགས་འཕེལ་རྒྱས་ཤོག། །
སྨོན་ལམ་འདི་མི་ཕམ་རིན་པོ་ཆེ་གིས་གསུངས་པའི་བཀྲ་ཤིས་བརྒྱད་པའི་མཆོད་ཆོག་ནང་ལས་བཏོན་ཏེ་ལོ་གསར་བརྩི་མི་ཡོངས་ལུ་ཕུལཝ་ཨིན།
