གནས་ཚུལ་མགུ་རྒྱན་ཞུན་དག།

འོག་ལུ་བཀོད་མི་འདི་ཚུ་འབྲུག་རྒྱང་བསྒྲགས་ཀྱི་ཡོངས་འབྲེལ་ནང་ལས་བཏོན་བཏོནམ་ཨིན།

༡༽ཤེས་རིག་གྲོང་ཁྱེར་ལུ་ཟངས་ཀྱི་རྟགས་མ་ཐོབ་ཡོདཔ།
༼ཤེས་རིག་གྲོང་ཁྱེར་གྱིས་ཟངས་ཀྱི་རྟགས་མ་ཐོབ་ཡོདཔ་༽ཟེར་འབྲི་བ་ཅིན་འོས་འབབ་ཆེ་ནི་མས།
༢༽རྒྱལ་པོ་ཞིང་གི་ས་ཆ་གོ་བཀྲམ་གི་རྩོད་གཞི་ལུ་འཁྲུན་ཆོད་གནང་ནི་ཨིནམ།
༼རྒྱལ་པོ་ཞིང་གི་ས་ཆ་བགོ་བཀྲམ་རྩོད་གཞི་གི་འཁྲུན་ཆོད་འཕྲལ་ར་གནང་ནི་ཨིནམ་༽ཟེར་འབྲི་བ་ཅིན་འོས་འབབ་ཆེ་ནི་མས། ག་ཅི་སྦེ་ཟེར་བ་ཅིན་རྩོད་གཞི་འདི་ལུ་འཁྲུན་ཆོད་གནང་ག་མི་གནང་ཟེར་བའི་དོགས་པ་ཟ་མི་ག་ཡང་མེད། རྩོད་གཞི་ག་ཅི་ར་ཨིན་རུང་ཁྲིམས་ཁང་ནང་རྩོད་བཤེར་བཙུགས་ཚར་ཞིནམ་ལས་འཁྲུན་ཆོད་གནང་ནི་ངེས་བདེན་ཨིནམ་ལས་འཁྲུན་ཆོད་གནང་ནི་འདི་གནས་ཚུལ་མེན། དེ་འབདཝ་ད་འཁྲུན་ཆོད་ནམ་གནང་ནི་ཨིན་ན་འདི་མི་ཚུ་གིས་མི་ཤེས། དེ་འབདཝ་ལས་འདི་གི་སྐོར་ལས་སླབ་ནི་ཡོད་པ་ཅིན་གནས་ཚུལ་ཨིན།
ད་རུང་འདི་ནང་ལུ་སྦྱོར་ཚུལ་གྱི་ནོར་འཁྲུལ་ཅིག་ཡང་འདུག། འཁྲུན་ཆོད་འདི་རྩོད་གཞི་ལུ་གནང་ནི་མེན། རྩ་ཕན་གཉིས་ལུ་གནངམ་ཨིན། དེ་འབདཝ་ལས་༼རྩོད་གཞི་ལུ་འཁྲུན་ཆོད་གནང་ནི་་ཨིནམ་༽ཟེར་མེན་པར་༼རྩོད་གཞི་གི་འཁྲུན་ཆོད་གནང་ནི་ཨིནམ་༽ཟེར་བ་ཅིན་འོས་འབབ་ཆེ་ནི་མས།
༣༽མི་སྡེའི་དཔེ་མཛོད་ཀྱིས་སློབ་ཕྲུག་ཚུ་ཕན་ཐོགས་དོ་ཡོདཔ།
༼མི་སྡེའི་དཔེ་མཛོད་ཀྱིས་སློབ་་ཕྲུག་ཚུ་ལུ་ཕན་ཐོགས་དོ་ཡོདཔ་༽ཟེར་འབྲི་དགོ། ག་ཅི་སྦེ་ཟེར་བ་ཅིན་ཕན་ཐོགས་ཟེར་མི་འདི་བྱ་བ་ཅིག་ཨིན། བྱ་བ་དེ་གི་འཇུག་ཡུལ་འདི་སློབ་ཕྲུག་ཚུ་ཨིན་མས། ཕན་ཐོགས་པའི་བྱ་བ་འབད་མི་འདི་དཔེ་མཛོད་ཨིནམ་སྟོན་ནིའི་དོན་ལུ་བྱེད་སྒྲའི་ཕྲད་སྦྱར་ནུག། དེ་བཟུམ་སྦེ་ཕན་ཐོགས་པའི་ཡུལ་སློབ་ཕྲུག་ཨིནམ་སྟོན་ནིའི་དོན་ལུ་ཡང་ཕྲད་ཅིག་སྦྱར་དགོ། འ་ནི་གི་ཕྲད་དེ་ལ་དོན་གྱི་ཕྲད་༼ལུ་༽ལས་གཞན་འགྱོ་ས་མེད།
༤༽སེམས་རྟོགས་ཁ་གི་སློབ་ཕྲུག་ཚུ་སྟག་རྩེ་འབྲིང་རིམ་སློབ་གྲྭ་གོང་མའི་ནང་སྤོ་ཡོདཔ།
༼སེམས་རྟོགས་ཁ་རྒྱལ་ཡོངས་སྐད་ཡིག་དང་ལམ་སྲོལ་སློབ་གྲྭ་སྟག་རྩེ་ལུ་སྤོ་ཡོདཔ།༽ཟེར་འབྲི་དགོ་ནི་མས། ག་ཅི་སྦེ་ཟེར་བ་ཅིན་སློབ་ཕྲུག་ཚུ་འདི་ཨ་རྟག་ར་སྤོཝ་སྤོ་ས་ར་ཨིན། དུས་ཅི་སྤོ་མི་འདི་སློབ་ཕྲུག་རྐྱངམ་ཅིག་མིན་པར་སློབ་གྲྭ་འདི་ར་སྤོ་ཡར་སོ་ནུག། ཁྱེད་ཀྱི་སེམས་ཁ་ལུ་སློབ་གྲྭ་འདི་མ་སྤོ་བས་ཟེར་མནོ་དོ་འོང་ནི་མས། སློབ་གྲྭ་ཟེར་མི་འདི་སློབ་སྟོན་དང་སློབ་སྦྱོང་འབད་སའི་ས་ཁོངས་ལུ་སླབ་ཨིན། འ་ནི་སྤོ་ཡར་སོང་པ་ཅིན་སློབ་གྲྭ་སྤོཝ་ཨིན། སློབ་གྲྭ་སྤོ་ཡི་ཟེརཝ་ད་ཁྱིམ་འདི་ཚུ་ཡང་ག་ར་ཤུབས་ཏེ་འབག་འགྱོ་མི་དགོ།
དཔྱེ་འབད་བ་ཅིན་ དབང་འདུས་སྒང་སྟེང་ཐང་ཁའི་ཁྲོམ་སྦ་ཇོ་ལུ་སྤོ་བཏངམ་ད། སྒང་སྟེང་ཐང་ཁའི་ཁྱིམ་ཚུ་བཤུབས་ཏེ་སྦ་ཇོ་ལུ་བསྐྱལ་བསྐྱལཝ་མེན། སྒང་སྟེང་ཐང་ཁའི་ཁྱིམ་འདི་ཚུ་བཤུབས་བཏང་བཏངམ་བདེན་རུང་། སྦ་ཇོ་ལུ་ཁྱིམ་གསརཔ་རྐྱབ་རྐྱབ་ཨིན།
༥༽ཚར་བཟོའི་ལཱ་འབད་མི་ མར་ཕབ་འགྱོ་དོ་ཡོདཔ།
༼ཚར་བཟོའི་ལཱ་འབད་མི་མར་འབབ་འགྱོ་དོ་ཡོདཔ་༽ཟེར་འབྲི་དགོ་ནི་བཟུམ་མཐོང་མས། མི་ཅིག་གིས་མར་ཕབ་བཏང་བཏངམ་ཨིན་པ་ཅིན་༼ཕབ་༽ཟེར་འབྲི་ནི་དང་ག་གིས་ཡང་ཕབ་ཕབ་མེད་རུང་ཁོ་ར་གིས་ར་འབབ་ཡར་སོ་མི་འདི་ལུ་༼འབབ་༽ཟེར་འབྲི་བ་ཅིན་འོས་བབས་ཆེ་ནི་མས། དཔྱེ་འབད་བ་ཅིན་ ང་གིས་ཕབ་ཅི། ཁོ་ར་གིས་ར་འབབ་ཡར་སོ་ཡི། ཟེར་དོ་བཟུམ་ཨིན་ནོ༎ 

དེ་སྦེ་བྲིས་མི་འདི་ཡང་ང་ར་མཁས་ཉམས་སྟོན་ནི་དང་འབྲུག་རྒྱང་བསྒྲགས་དམའ་ཕབ་རྐྱབ་ནི་གི་དོན་ལུ་མིན་པར་ག་ར་ལུ་ཕན་ཐོགས་ཅིག་ཡོད་པ་ཅིན་མནོ་སྟེ་བྲིས་བྲིཝ་ཨིན། ང་བཅས་རའི་རྒྱལ་ཡོངས་སྐད་ཡིག་རྫོང་ཁ་དེ་ལུ་འབྲི་ཐངས་ཀྱི་ལམ་ལུགས་དེ་དང་དེ་ཟེརཝ་ཅིག་མེད་མི་ལུ་བརྟེན་ཏེ་གཅིག་འགྱུར་གྱི་འབྲི་ཐངས་ཅིག་རྩ་ལས་ར་འོང་མི་སྲིད་ནི་མས། གལ་སྲིད་རྫོང་ཁའི་འབྲི་ཐངས་ཀྱི་ལམ་ལུགས་ཚུལ་མཐུན་ཅིག་མེད་པ་ཅིན་རྫོང་ཁའི་འབྲི་ཐངས་གཅིག་འགྱུར་མི་འོང་ནི་དང་། གཅིག་འགྱུར་མེད་པ་ཅིན་རྒྱལ་ཡོངས་སྐད་ཡིག་གི་ཁྱད་ཆོས་ཡང་མི་ཚང་། ལྷག་པར་དུ་ཡང་ཁ་ལས་སླབ་ནི་དང་ཡིག་ཐོག་འབྲི་ནི་གཉིས་ཀྱི་བར་ན་ཐག་རིངམ་ཐལ་མྱོ་བ་ཅིན་དེ་ལས་ཡིག་ཐོག་བྲིས་ཏེ་ཡོད་པའི་རྫོང་ཁ་འདི་རྫོང་ཁའི་རྩོམ་པ་པོ་དག་པ་ཅིག་རྐྱངམ་གཅིག་གི་སྐད་ཡིག་ལུ་འགྱུར་འོང་། འ་ནི་སྦེ་འབད་ནི་འདི་གིས་གོང་གི་དེ་ཚུ་ལྷག་བསམ་རྣམ་དག་གི་ཐོག་ལས་བྲིས་བྲིཝ་ཨིནམ་མ་གཏོགས་དེ་ལས་གཞན་ཀུན་སློང་སོ་སོ་ག་ནི་ཡང་མེད། དེ་སྦེ་འབད་ནི་འདི་གིས་འབྲུག་རྒྱང་བསྒྲགས་ཀྱིས་ངེ་གི་ཟིན་བྲིས་འདི་གཟིགས་པ་ཅིན་ཐུགས་ལུ་རྣམ་རྟོག་དང་དོགས་པ་བཞེས་མ་གནང་ཟེར་ཞུ་ནི་ཨིན།