ཆོས་ཕྱོགས་གསལ་བསྒྲགས།

༸སྐྱབས་རྗེ་སྒང་སྟེང་རིན་པོ་ཆེ་མཆོག་གིས་ གཏེར་སྟོན་གྱི་རྒྱལ་པོ་ལྔའི་ཡ་གྱལ་རིག་འཛིན་ཆེན་པོ་པདྨ་གླིང་པའི་ཟབ་གཏེར་གྱི་བསྟན་པ་ཉམས་པ་སོར་ཆུད་དང་ མི་ཉམས་རྒྱུན་འཛིན་དར་སྤེལ་གྱི་ཆེད་དུ་གཞི་བཙུགས་མཛད་གནང་ཡོད་པའི་ པད་གླིང་ཆོས་ཀྱི་དགའ་ཚལ་གཞི་ཚོགས་འདི་ སྤྱི་ལོ་༢༠༡༢ སྤྱི་ཟླ་༡༠ པའི་ཚེས་༣༡ ལུ་ ཐིམ་ཕུ་ན་གཞོན་དཔལ་རིའི་སྤྱི་དོན་ཁང་ནང་ལུ་སྦེ་ སྒོ་འབྱེད་མཛད་གནང་ནི་ཨིན་མས། སྒོ་འབྱེད་རྟེན་འབྲེལ་འདི་དང་འབྲེལ་ཏེ་ གཞི་ཚོགས་ཀྱི་དོན་ལུ་ བློ་གཏད་མ་དངུལ་གཞི་བཙུགས་ཀྱི་ལས་རིམ་ཅིག་ཡང་འགོ་འདྲེན་འཐབ་ནི་གི་ལས་འཆར་འདུག དེ་འབདཝ་ལས་ སྤྱིར་ལྷོ་གཏེར་གྱི་བདག་པོ་རིག་འཛིན་པདྨ་གླིང་པའི་རྗེས་འཇུག་དང་ ཡང་སྒོས་རྒྱལ་བ་པདྨ་གླིང་པའི་ཟབ་གཏེར་གྱི་བསྟན་པའི་བདག་པོ་ ༸སྐྱབས་རྗེ་སྒང་སྟེང་རིན་པོ་ཆེ་མཆོག་དང་འབྲེལ་བ་ཡོད་མི་ཚུ་གིས་གཙོས་པའི་དད་ཅན་ག་ར་གིས་ མཛད་སྒོ་འདི་ནང་འབྲེལ་གཏོགས་གནང་སྟེ་ མེ་ཏོག་ཆུང་རུང་མཆོད་པའི་རྫས་ཟེར་སླབ་སྲོལ་ཡོད་དོ་བཟུམ་སྦེ་ ཞལ་འདེབས་ཆེ་ཆེ་ཆུང་ཆུང་རེ་ཕུལ་གནང་ཟེར་ཞུ་ནི་ཨིན། 

མཛད་སྒོའི་རིམ་པ།

ཕྱི་རུའི་ཆུ་ཚོད་༥ ལུ་ སྐུ་མགྲོན་ཚུ་ཕེབས་ནི།

སྐུ་མགྲོན་ཚུའི་མཚན་ཐོ་ཐོ་བཀོད་འབད་ནི།

གསོལ་ཇ་དང་མངར་ཆུའི་རིགས་དྲང་ནི།

ཕྱི་རུའི་ཆུ་ཚོད་༥.༣༠ ལུ་ སྐུ་མགྲོན་གཙོ་བོ་ཕེབས་ནི།

ཕྱི་རུའི་ཆུ་ཚོད་༥.༤༥ ལུ་ གཞི་ཚོགས་ཀྱི་ཡོངས་ཁྱབ་དྲུང་ཆེན་གྱིས་ སྐུ་མགྲོན་ཚུ་ལུ་བྱོན་པ་ལེགས་སོའི་ཞུ་བ་ཕུལ་ནི།

ཕྱི་རུའི་ཆུ་ཚོད་༥.༥༥ ལུ་ གཞི་ཚོགས་ཀྱི་ཁྲི་འཛིན་༸སྐྱབས་རྗེ་སྒང་སྟེང་རིན་པོ་ཆེ་མཆོག་གིས་ པད་གླིང་གི་ཆོས་ཀྱི་རྒྱབ་ཁུངས་དང་ པད་གླིང་ཆོས་ཀྱི་དགའ་ཚལ་གྱི་དམིགས་ཡུལ་དང་དགོས་དོན་ཚུ་གི་སྐོར་ལས་ གསལ་བཤད་གནང་ནི།

ཕྱི་རུའི་ཆུ་ཚོད་༦.༡༥ ལུ་ སྐུ་མགྲོན་ཚུ་གིས་ ཞལ་འདེབས་ཕུལ་ནི།

བཀའ་དྲིན་དགའ་ཚོར་ཞུ་ནི།

ཐུགས་སྤྲོའི་ལས་རིམ་ཞབས་བྲོ་སྤྱན་འབུལ་ཞུ་ནི།

ཕྱི་རུའི་ཆུ་ཚོད་༨.༣༠ ལུ་ ཚོགས་སྟོན་དྲང་ནི།

ཕྱི་རུའི་ཆུ་ཚོད་༩.༣༠ ལུ་ བཀྲ་ཤིས་ལེགས་སྨོན་བཅས་མཇུག་བསྡུ་ནི། 

 

བཀྲ་ཤིས་བདེ་ལེགས།