དགའ་མཐུན་གཉེན་སྒྲིག་ཀྱི་དཀའ་ངལ།


ཨ་མི་རི་ཀའི་ཕོ་རྒྱ་གཅིག་དང་ རྒྱ་གར་གྱི་ཕོ་རྒྱ་གཅིག་ ཆང་ཁང་ཅིག་ནང་ ཆང་འཐུང་ཡི་འཐུང་ཡི་ར་ བཤད་ཐོ་བཏང་སྡོད་ནུག། 

དེ་སྦེ་བཤད་ཐོ་བཏང་སྡོད་པའི་སྐབས་ལུ་ རྒྱ་གར་གྱིས་ ཨ་མི་རི་ཀཱན་ལུ་ དེ་སྦེ་སླབ་ནུག།  "ངེའི་ཕམ་གཉིས་ཀྱིས་ ང་ གཡུས་ཁའི་བུམོ་གཅིག་དང་གཅིག་ཁར་ གཉེན་རྐྱབ་ཟེར་སླབ་མས།  བུམོ་དེ་ ང་གིས་ ཚར་གཅིག་ར་ཕྱད་ཕྱདཔ་མེད་སྟེ།  ཁོང་གིས་ ང་ དང་ཕུ་གི་ལུགས་སྲོལ་བཟུམ་སྦེ་ བཙན་དབང་གཉེན་སྒྲིག་ འབད་བྱིན་ནི་སྦེ་ཨིན་མས་སི།  རང་ མ་དགའ་མི་དང་གཅིག་ཁར་ ག་དེ་སྦེ་གཉེན་རྐྱབ་ནི་ས།  གཉེན་ཟེར་མི་འདི་ང་ར་དགའ་མཐུན་གྱི་ཐོག་ལས་རྐྱབ་ནི་མ་གཏོགས་  ཁྱེད་ཀྱིས་བཙན་སྒྲིག་འབད་མི་དང་གཅིག་ཁར་རྐྱབ་མི་ཚུགས་ཟེར་ ང་ཁོང་ར་ལུ་ཐད་ཀར་དུ་སླབ་བྱིན་ཡི།  ད་ང་བཅས་བཟའ་ཚང་ནང་ལུ་སྟབས་མ་བདེཝ་སྦོམ་ཐོན་ཏེ་ཡོད།"

ཨ་མི་རི་ཀཱན་གྱིས་དེ་སྦེ་སླབ་ནུག།  "དགའ་མཐུན་གྱི་ཐོག་ལས་གཉེན་རྐྱབ་རུང་ དཀའ་ངལ་འདུག་མས།  དེའི་སྐོར་ལས་ང་རའི་མི་ཚེ་ལུ་གཞི་བཞག་སྟེ་སླབ་པ་ཅིན།  ང་གིས་ ཨམ་སྲུ་ཡུག་ས་མོ་ཅིག་དང་གཅིག་ཁར་དགའཝ་མཐུནམ་སྦེ་སྡོད་དེ་ ལོ་གསུམ་གྱི་ཤུལ་ལས་ གཅིག་ཁར་བསྡོམས་ཆི།  དེ་སྦེ་བསྡོམས་ཏེ་ལོ་དག་པ་གཅིག་གི་ཤུལ་ལས་ ངེའི་ཨ་པ་གིས་ ངེའི་བུམོ་གཡར་དང་ཆ་ དགའཝ་མཐུནམ་ཐལ་ཏེ་གཉེན་རྐྱབ་ཆིཝ་ལས་ ངེའི་ཨ་པ་འདི་ ངེའི་ཚཝ་དང་ ང་ ང་རའི་ཨ་པ་གི་ཨ་ཞང་ལུ་གྱུར་སོ་ཡི། 

"འ་ནེ་སྦེ་འབདཝ་ད་ ང་རའི་བུམོ་གཡར་འདི་ ངེའི་ཨམ་ཅུམ་དང་ ང་རའི་ཨམ་སྲུ་འདི་ ངེའི་ཨང་རྒས་ལུ་གྱུར་སོ་ཡི།  ད་རུང་འདི་གུ་ ང་ལུ་ བུ་གཅིག་ཐོན་ཞིནམ་ལས་འདི་ དཀའ་ངལ་ཧེང་བཀལ་ཐོན་ཡི།  ག་དེ་སྦེ་ཟེར་བ་ཅིན་ ངེའི་བུ་འདི་གིས་ ངེའི་ཨ་པ་ལུ་སྐུདཔོ་ཕོགཔ་ལས་ ང་གིས་ ང་རའི་བུ་ལུ་ ཨ་ཞང་ཕོག་ཆི་སྟེ། 

"ངེའི་ཨ་པ་དང་བུམོ་གཡར་གཉིས་ལུ་བུ་གཅིག་ཐོན་པའི་བསྒང་ལས་འདི་ གནས་སྟངས་འདི་གནམ་མེད་ས་མེད་དགོད་བྲ་སི་སི་ཅིག་ལུ་གྱུར་སོ་ཡི།  ངེའི་ཨ་པའི་བུ་ ངེའི་ནུ་གཅུང་ལུ་ ང་གིས་དིབུ་ཕོག་ཅི།  ད་ངེའི་ནུ་གཅུང་གིས་ང་ལུ་ཨ་རྒས་ཕོག་པའི་བསྒང་ལས་ ང་གིས་ང་ར་ལུ་ཨ་རྒས་ཕོག་ནི་མས།  ང་གིས་ང་རའི་ནུ་གཅུང་ལུ་ དིབུ་ཕོགཔ་ལས་ ང་ང་རའི་དིབུ་ལུ་གྱུར་སོ་ཡི། 

"འ་ནི་བཟུམ་དང་ཕྱད་པ་ཅིན་ ཁྱོད་ཀྱི་འདི་ ག་ནི་ཡང་མེན་པས་སྟེ།"

དེ་སྦེ་སླབ་ད་ རྒྱ་གར་འདི་ དྲན་མེད་ར་བརྒྱལ་སོ་ནུག། 

No comments: