རྫོང་ཁ་ལུ་སྣང་མེད་བསྐྱུར་བ་ཅིན་ཁྲིམས་ག་ཅི་ཡོད་ག།

རྫོང་གཞིས་ཁག་དང་གཞུང་གི་ཡིག་ཚང་ནང་ལས་ཕར་འགྱོ་དགོ་པ་ཅིན་ རང་ལུགས་ཀྱི་རྒྱལ་ཡོངས་གྱོན་ཆས་གྱོན་ཏེ་སྒྲིག་ལམ་རྣམ་གཞག་གི་ཐོག་ལས་འགྱོ་དགོ་དོ་ཡོདཔ་ཨིན། དེ་བཟུམ་སྦེ་རྒྱལ་ཁབ་ཀྱི་ས་ཁོངས་ལ་ལུ་ཅིག་ནང་ རྒྱལ་ཡོངས་ཀྱི་གྱོན་ཆས་མ་གྱོན་པར་འགྱོ་མ་ཆོག་པའི་ས་ཁོངས་ཡང་འདུག། གལ་སྲིད་ཁྲིམས་ལུགས་དེ་དང་འགལ་བ་ཅིན་དེ་འཕྲལ་ལས་ཁྲིམས་སྲུང་འགག་པ་གིས་བཟུང་འབག་སྟེ་དོ་དམ་གྱི་འོག་ལུ་བཞགཔ་ཨིན་མས། 

ཨིན་རུང་རྫོང་གཞིས་ཁག་དང་ཡིག་ཚང་ནང་ལས་ཕར་ཨིན་ཅི་མིན་ཅི་རྒྱལ་ཡོངས་ཀྱི་ཁ་སྐད་རྫོང་ཁ་རྐྱབ་དགོཔ་ཟེར་མིན་འདུག། དེ་མ་ཚད་ཡིག་ཐོག་ལུ་འབྲི་རུང་ག་དགའཝ་སྦེ་འབྲི་བ་མ་བཏུབ་མིན་འདུག། རྒྱལ་ཡོངས་ཀྱི་གྱོན་ཆས་དང་རྒྱལ་ཡོངས་ཁ་སྐད་གཉིས་ཆ་ར་འབྲུག་གི་རྒྱལ་ཁབ་ཀྱི་ངོ་རྟགས་ཨིནམ་འདྲ་འདྲ་ཨིན་རུང་། གཅིག་ཨིན་ཅི་མིན་ཅི་ལག་ལེན་འཐབ་དགོཔ་མ་ཚད། ཚུལ་མཐུན་ཐོག་ལས་ལག་ལེན་འཐབ་དགོཔ་དང་། གཅིག་འདི་ཨིན་ཅི་མིན་ཅི་ལག་ལེན་འཐབ་དགོཔ་ཟེརཝ་མེད་པའི་ཁར། ལག་ལེན་འཐབ་སྟེ་འབད་ས་ཅིག་རུང་ག་དགའཝ་སྦེ་ལག་ལེན་འཐབ་བཏུབ་མི་འདི་ ག་ཅི་ལུ་བརྟེན་ཏེ་ཨིན་ན་སྨོ། 

ང་གིས་འབད་བ་ཅིན་རྫོང་ཁ་ལག་ལེན་འཐབ་ནི་ལུ་ཡང་ཁྲིམས་ལུགས་ཅིག་བཟོ་དགོ་པའི་ཁར་ རྫོང་ཁ་ཚུལ་མཐུན་ཐོག་ལས་ལག་ལེན་མ་འཐབ་མི་ལུ་ཉེས་ཁྲིམས་ཅིག་ཡང་ཨིན་ཅི་མིན་ཅི་བཀལ་དགོཔ་འདུག། 

དེ་མིན་པ་ཅིན་ང་བཅས་རའི་རྒྱལ་ཡོངས་སྐད་ཡིག་འདི་ལུ་ འོག་གི་པར་ནང་མཐོང་དོ་བཟུམ་ སྣང་མེད་བསྐྱུར་ཏེ་བརྙས་བཅོས་འབད་མི་ གྱངས་ཁ་མ་ཆོདཔ་ཅིག་ཐོན་ནི་མས་ཟེར་ཞུ་ནི་ཨིན། 

དེ་ཡང་འོག་གི་པར་ནང་གི་རྫོང་ཁའི་དག་ཆ་ཚུ་ ཤེས་ཅི་མཐོང་ཅི་ར་ བརྙས་བཅོས་འབད་དེ་བྲིས་བྲིཝ་མ་གཏོགས་ མ་ཤེས་མ་མཐོང་པར་འབྲི་བྲིཝ་རྩ་ལས་ར་མེན། ག་ཅི་སྦེ་ཟེར་བ་ཅིན་ འོག་ལུ་བཀོད་དེ་ཡོད་པའི་པར་དེ་ཚུ་གཞན་གྱིས་བཟོ་བཅོས་འབད་འབདཝ་མེན་པ་ཅིན་ གཅིག་འདི་ནི་སློབ་གྲྭ་ཆེ་བ་ཅིག་གི་བརྡ་བྱང་ཨིན་མས། སློབ་གྲྭ་ཆེ་བ་ནང་ལུ་རང་གི་སློབ་གྲྭའི་མིང་གི་དག་ཆ་ཚང་ཚུགས་མི་ཅིག་ར་མེདཔ་འདི་མི་འོང་མེན་ན། 

དེ་ལས་གཅིག་འདི་ནི་རྩེད་རིགས་ཚོགས་པ་གིས་གནང་གནངམ་གི་ལག་ཁྱེར་ཨིན་མས། རྩེད་རིགས་ཚོགས་པ་འདི་འབྲུག་གི་རྒྱལ་ཡོངས་ཀྱི་གནས་ཚད་ནང་ལུ་མིང་གཏམ་ཡོད་པའི་ཚོགས་པ་སྦོམ་ཤོས་ཅིག་ཨིན། འབྲུག་གི་རྒྱལ་ཡོངས་ཀྱི་གནས་ཚད་ནང་ལུ་མིང་གཏམ་སྦོམ་ཡོད་པའི་ཚོགས་པ་གིས་རྒྱལ་ཡོངས་ཀྱི་མི་མང་ལུ་གནང་ནི་ཨིན་མི་ལག་ཁྱེར་དེམ་ཅིག་གྲ་སྒྲིག་འབད་ཚུགསཔ་ད་ལུ། རྫོང་ཁའི་ཡི་གུ་ཡིག་ཕྲེང་གཅིག་འབད་མི་ཅིག་དག་ཆ་ཚངམ་སྦེ་འབྲི་མ་ཚུགསཔ་འོང་ག། 

དེ་འབདཝ་ལས་འབྲེལ་ཡོད་དབང་འཛིན་ཚུ་གིས་ན་འཐན་ར་ཐུགས་བསམ་བཞེས་དགོ་པའི་དུས་ཚོད་གུ་ལྷོད་སོ་ནུག་ཟེར་ཞུ་ནི་ཨིན།